Mən Pənahəli xanın nəslindənəm. Bu, sadəcə bir soyun adı deyil — bu, bir məsuliyyət, bir tarix, bir qürur deməkdir. Bizim evimizdə tarix sadəcə bir dərs vəsaiti yox, gündəlik həyatın ayrılmaz parçası idi. Soy-kökümüzə bağlılıq, ulu babalarımızın adını uca tutmaq bizə ailə dəyəri kimi öyrədilirdi. Uşaqlığımız bu ruhda, bu tərbiyədə keçdi.
Uşaqlıq illərim Azərbaycanın çətin, amma bir o qədər də qəhrəmanlıqla dolu bir dövrünə təsadüf etdi — müharibə illərinə. Həyat nə qədər çətin olsa da, evimizin bir ritualları vardı: axşamlar televizorun qarşısında toplaşmaq və ulu öndər Heydər Əliyevin çıxışlarını dinləmək. Mən özümü tanıyandan ailəmi onun səsini dinləyən görmüşəm. Bəlkə də ona görə bu səs bizim üçün sadəcə bir siyasi liderin səsi yox, ümidin, inamın və sabaha olan etibarın rəmzi idi.
Atam deyərdi: “Bizi qalibiyyətə bu səs aparacaq.” Uşaq olsam da, bu sözlərin ağırlığını və mənasını duyurdum. Heydər Əliyevin hər bir çıxışında bir əminlik, bir sabitlik vardı. O, xalqın ruhuna toxunmağı bacarırdı. O səsin arxasında yalnız siyasət yox, həm də xalqına dərin sevgi və məsuliyyət hiss olunurdu. O səs bizim evimizin sabit sədası, böyüməyimizin musiqisi idi.
Biz Heydər Əliyevi rəhbər tutaraq böyüdük. Onun söylədikləri bizim üçün qanun, onun siyasəti isə bir həyat fəlsəfəsi idi. Biz onun vətənə sevgisini, xalqına sədaqətini öz həyatımıza daşıdıq. Onun yolunu davam etdirən insanlar olaraq bu gün də ölkəmizin uğurlarını görmək, bu siyasi mirasın yaşadığını hiss etmək bizə həm fəxr, həm də rahatlıq verir.
Nə xoş mənə ki, onunla eyni dövrdə yaşaya bildim. Onun ruhu, amal və ideyaları hər bir azərbaycanlının qəlbində yaşayır. Mənim üçün Heydər Əliyev təkcə bir lider yox, həm də milli kimliyimizin, dövlətçiliyimizin simvoludur.
Bu gün Pənahəli xanın nəslindən gələn biri kimi, həm də Heydər Əliyev məktəbində yetişmiş bir insan olaraq fəxrlə deyə bilərəm: keçmişimizlə fəxr edir, gələcəyə inamla baxırıq. Tariximizdən güc alaraq, bugünü yaşayıb sabaha doğru inamla irəliləyirik.
… Mənim üçün Heydər Əliyev təkcə bir lider yox, həm də milli kimliyimizin, dövlətçiliyimizin simvoludur.
Bu gün, 10 may — ümummilli lider Heydər Əliyevin 102-ci doğum günündə onu dərin ehtiramla anıram. Onun kimi şəxsiyyətlər zamanla yox, zamanın fövqündə yaşayır. Hər keçən il onun irsinin nə qədər möhkəm təməl üzərində qurulduğunu, onun ideyalarının necə yaşadığını bir daha görürük.
Nə qədər Azərbaycan var, Heydər Əliyev də var! Onun səsi, fikirləri və amal yolu gələcək nəsillərə işıq tutmağa davam edəcək.
Əbədiyaşar liderimizə Allahdan rəhmət diləyir, onun nurlu xatirəsi qarşısında baş əyirəm.
Yaşasın Azərbaycan! Yaşasın Heydər Əliyev ideologiyası!
İmza: Tural İbrahimov
