Öləcəyəm haçansa
Yuyacaq cəsədimi
günah boyda birisi
Öləcəyəm haçansa
Arxamca hey söyəcək
məndən kənar gəzənlər
Tutacaq tabutumu
içki içən qonşumuz
Uşaqlıq dostlarımın
İşləri çox olacaq
Beş ildir məndən küsən
qardaşım hönkürəcək
Hər dəfə ağlatdığım
anam ağı deyəcək
Saçın yolacaq bacım
Atam ağlamayacaq
güləcək mən gedərkən
Sonra unudulacam
90-cı illərin
soyuq payızı kimi
Adamlar xatırlayıb
deyəcəklər yavaşca
Belə adam var idi
Sonra başqa birisi
söhbəti dəyişəcək:
Ağac meyvəli idi
Çoxlu badam var idi
Necə nəfsim çəkdisə
tez qoparıb götürdüm
Başqası danışacaq
Berlindəki oğlundan
Bakıdakı qızından
Bir ər vardı dünyada
indi arvadı qalıb
Bir ata yaşayırdı
bir vaxtlar bu küçədə
İndi oğlu tələbə
Dostlarıyla sümürür
siqareti içinə
Atasının aldığı
pencək həsrət qoxuyur
İnildəyir jaketin
saplarında xatirə
Gülür böyük şəhərin
cahıl oğulları tək
Bir dekabr var idi
Onun beşi var idi
90-ci il idi
Havanın nəmişliyi
sərin qışı var idi
Bir körpə doğulmuşdu
Sevinmişdi qohumlar
Öpülmüşdü çoxluca
Gəzmişdi qucaqları
Məktəbdə sevilmişdi
Tələbə də olmuşdu
Evlənib ailə qurmuş
Bir oğlu da olmuşdu
Bir oğlu da olmuşdu…
